Inaresto ng mga operatiba ng Philippine Drug Enforcement Agency (PDEA) at Magdiwang Municipal Drug Enforcement Team (MDET) ang isang 61-anyos na empleyado ng pamahalaan matapos umanong mahulihan ng hinihinalang shabu sa isinagawang buy-bust operation sa Public Market ng Barangay Poblacion, Magdiwang, Romblon noong Hunyo 15.
Kinilala ng pulisya ang suspek bilang isang Revenue Collection Clerk III ng lokal na pamahalaan at residente ng Barangay Poblacion, Magdiwang. Nakalista rin umano siya bilang high-value target (HVT) sa kampanya kontra iligal na droga.
Batay sa ulat, bandang alas-10:00 ng umaga nang magsagawa ng buy-bust operation ang magkasanib na puwersa ng MDET at PDEA Romblon, sa koordinasyon ng PDEA Regional Office.
Narekober umano mula sa suspek ang isang sachet ng hinihinalang shabu na nabili ng poseur-buyer kapalit ng P500 marked money.
Sa isinagawang body search, nakuha rin umano mula sa kanyang pag-iingat ang tatlong karagdagang sachet na naglalaman ng hinihinalang shabu, dalawang bukas na sachet na may bakas ng hinihinalang iligal na droga, at dalawang piraso ng aluminum foil strips na may hinihinalang drug residue.
Ayon sa mga awtoridad, tinatayang may kabuuang timbang na dalawang gramo ang mga nakumpiskang hinihinalang shabu na may standard drug price na P13,600.
Kasalukuyang nasa kustodiya ng Magdiwang Municipal Police Station ang suspek habang inihahanda ang kasong paglabag sa Sections 5 at 11, Article II ng Republic Act 9165 o Comprehensive Dangerous Drugs Act of 2002.
Ang mga nakumpiskang ebidensya ay isusumite sa PDEA MIMAROPA para sa pagsusuri at kaukulang disposisyon.
