Nakiisa ang mga miyembro ng Citizen Armed Forces Geographical Unit (CAFGU) at mga benepisyaryo ng Pantawid Pamilyang Pilipino Program (4Ps) sa isinagawang Brigada Eskwela sa Limon Norte National High School (LNNHS) sa Barangay Limon Norte, Looc, Romblon noong Hunyo 2.
Pinangunahan ni 1st Sergeant Joseph Manalon ng CAFGU ang aktibidad kasama ang mga boluntaryong benepisyaryo ng 4Ps.
Kabilang sa isinagawang mga gawain ang paglilinis, pagkukumpuni, at pagpapanatili ng iba't ibang pasilidad ng paaralan bilang paghahanda sa pagbubukas ng klase.
Ayon kay Elmor Mandinguiado, Secondary School Head Teacher III ng Limon Norte National High School, isinagawa ang aktibidad upang maihanda ang mga silid-aralan at iba pang pasilidad para sa pagpasok ng mga mag-aaral sa bagong taon ng panuruan.
Ang pakikilahok ng mga benepisyaryo ng 4Ps ay bahagi ng pagpapatupad ng mga programa ng Department of Social Welfare and Development (DSWD) na hinihikayat ang pagsunod sa mga kondisyon ng programa at pakikibahagi sa mga gawaing pangkomunidad.
Nagpasalamat naman si Mandinguiado sa mga miyembro ng CAFGU, mga boluntaryong benepisyaryo ng 4Ps, at iba pang lumahok sa Brigada Eskwela.
Ang Brigada Eskwela ay taunang programa ng Department of Education (DepEd) na isinasagawa bago ang pagbubukas ng klase upang ihanda ang mga paaralan sa pamamagitan ng pakikilahok ng mga boluntaryo, lokal na pamahalaan, samahang pangkomunidad, at iba pang mga katuwang. — with reports from Danilyn Caunca and Mary Jane Redoban
Discussion about this post