Ipinagpaliban muna ng Sangguniang Barangay ng España ang pagtalakay sa kahilingan ng Altai Philippines Mining Corporation kaugnay ng muling pag-aaral sa pagbibigay ng endorso para sa feasibility at operasyon ng mining project sa lugar.
Sa panayam, sinabi ni Barangay Captain Marie Ann Roldan na pansamantalang hindi muna tatalakayin ang usapin upang bigyang-daan ang pagdiriwang ng kapistahan sa barangay ngayong linggo.
Ayon pa sa opisyal, bagamat hindi napagdesisyunan sa kasalukuyan, batid ng konseho ang iba’t ibang pananaw at hinaing ng mga residente hinggil sa isyu.
Kasabay nito, nagtipon sa harap ng Barangay Hall ang ilang grupo ng mga residente na may magkakaibang paninindigan, kabilang ang mga tutol at sumusuporta sa pagmimina, upang ipahayag ang kanilang mga posisyon habang isinasagawa ang sesyon ng konseho.
Ang desisyon ng barangay council sa usapin ay inaasahang tatalakayin sa susunod na mga pagpupulong matapos ang mga aktibidad sa barangay.
