Unang beses na naging host ang lalawigan ng Romblon sa Regional Management Committee (REMANCOM) Meeting ng Department of Education (DepEd) MIMAROPA na dinaluhan ng mga opisyal ng ahensya mula sa iba’t ibang division offices sa rehiyon.
Tampok din sa programa ang pormal na pagtanggap kay Ronnie S. Mallari, PhD, CESO III bilang bagong Regional Director ng DepEd MIMAROPA.
Dumalo rin sa aktibidad sina Governor Trina Alejandra Q. Firmalo-Fabic, Congressman Eleandro Jesus “Budoy” Madrona, at Vice Governor Armando “Arming” Gutierrez, mga miyembro ng Sangguniang Panlalawigan, at mga alkalde mula sa iba’t ibang bayan ng Romblon.
Sa pulong, tinalakay ang iba’t ibang programa at usapin ng DepEd sa MIMAROPA, kabilang ang literacy programs, school facilities, access sa edukasyon, at iba pang hakbang para sa kapakanan ng mga mag-aaral at guro sa rehiyon.
Binigyang-diin din sa programa ang kahalagahan ng koordinasyon ng DepEd at mga lokal na pamahalaan upang mas mapalakas ang implementasyon ng mga programang pang-edukasyon.
Sa kanyang mensahe, ibinahagi ni Cong. Madrona ang pagdami ng mga national high schools sa Romblon mula 14 hanggang 51, bukod pa sa mga integrated schools sa lalawigan. Binanggit din niya ang conversion ng Romblon State College tungo sa Romblon State University upang mapalawak ang access sa higher education.
Ayon naman sa mga opisyal ng lalawigan, mahalagang pagkakataon ang pagho-host ng Romblon sa regional meeting upang maipakita ang mga programa at pakikipagtulungan ng lalawigan sa sektor ng edukasyon.
Binanggit din sa aktibidad na kabilang ang Romblon sa mga kinilalang lalawigan sa larangan ng basic literacy sa buong bansa.
Discussion about this post