Tinatayang tatlong ektaryang damuhan sa Isabel Island sa bayan ng Banton ang nasunog noong gabi ng Mayo 14, ayon sa imbestigasyon ng Bureau of Fire Protection (BFP) Banton.
Batay sa isinagawang imbestigasyon dakong ala-1:30 ng hapon ng May 15 ng BFP Banton katuwang ang Philippine National Police Banton, Philippine Coast Guard Banton, at MDRRMO Banton, lumalabas na nagmula ang sunog sa isang unattended open flame na posibleng iniwan ng mga taong bumibisita sa isla para mangisda.
Ayon sa imbestigasyon, kumalat ang apoy sa tuyong cogon grass na mabilis na kumalat sa ibang bahagi ng isla.
Wala namang naiulat na nasawi, nasugatan, o napinsalang ari-arian sa naturang insidente.
Dahil dito, ikinategorya ng BFP ang insidente bilang “Minimal Damage Fire Incident” dahil wala umanong naitalang malaking pinsala o epekto sa komunidad.
Wala ring nakitang anumang arson paraphernalia o ebidensyang magpapatunay na sinadyang sunugin ang damuhan.
Ayon pa sa BFP, wala umanong taong pananagutin kaugnay ng insidente.
Matatandaang ilang residente ng Marinduque ang nabahala matapos makita sa kanilang dalampasigan ang isla na nasusunog noong gabi ng May 14.
