Inaresto ng Philippine Coast Guard (PCG), sa pamamagitan ng Coast Guard Intelligence Force, ang isang babaeng suspek na umano’y sangkot sa estafa at usurpation of authority matapos magpanggap na opisyal ng Coast Guard noong April 5, 2026.
Ang suspek, 42-anyos at residente ng Alcantara, Romblon, ay naaresto sa isang boarding house sa Barangay Sta. Lucia, Capas, Tarlac matapos ang koordinasyon sa lokal na awtoridad. Kaagad siyang itinurn-over sa Capas Municipal Police Station para sa kaukulang disposisyon.
Sa beripikasyon ng Philippine National Police, napag-alamang may umiiral na warrant of arrest ang suspek para sa kasong theft na inilabas ng Regional Trial Court Branch 82 sa Odiongan, Romblon.
Tinitingnan din ng mga awtoridad ang iba pang posibleng kaso gamit ang mga alyas na “Lieutenant Commander Catherine M. Garcia” at “Catherine Garcia” kaugnay ng illegal recruitment at estafa.
Batay sa paunang imbestigasyon, nagpapakilala umano ang suspek bilang opisyal ng PCG sa social media upang makuha ang tiwala ng mga biktima at makahingi ng pera sa ilalim ng maling dahilan.
Kasalukuyang nakakulong ang suspek sa Capas Municipal Police Station habang inihahanda ang pagsasampa ng kaukulang kaso kabilang ang estafa, usurpation of authority, at mga paglabag na may kaugnayan sa illegal recruitment.
Nanawagan din ang PCG sa mga posibleng biktima na makipag-ugnayan sa pinakamalapit na tanggapan ng Coast Guard upang maitala ang mga insidente at makatulong sa imbestigasyon.
