Inaasahang mag-aalok ng dialysis treatment ang Isiah Hospital sa sandaling makumpleto ang bagong pasilidad nito sa mga susunod na buwan.
Ayon kay ISIAH Hospital CEO Diven Dimaala, inaasahang matatapos ang konstruksyon ng bagong ospital sa nalalapit na panahon na magbibigay-daan sa pagpapalawak ng serbisyong medikal sa bayan ng Looc at karatig na lugar.
Bukod sa dialysis services, mag-aalok din ang ospital ng hospitalization services kabilang ang emergency medicine, obstetrics and gynecology, pediatrics, surgery, at internal o family medicine. Magkakaroon din ng diagnostic services gaya ng kumpletong laboratoryo, X-ray, ultrasound, 2D echo, at ECG.
Inihayag din na magbibigay ang ospital ng mga serbisyong saklaw ng PhilHealth sa ilalim ng programang “PhilHealth Yakap” upang mapalawak ang access ng mga pasyente sa serbisyong pangkalusugan.
Sa oras na matapos ang pasilidad, inaasahang mapapalapit ang dialysis at iba pang serbisyong medikal sa mga residente ng Looc at kalapit na bayan sa lalawigan ng Romblon.
