Nakatakdang magsagawa ng libreng serbisyong medikal ang Altai Philippines Mining Corporation sa bayan ng San Fernando mula Abril 12 hanggang 19, 2026.
Ayon sa inilabas na anunsyo ng APMC, target na mabigyan ng libreng konsultasyon at gamot ang unang 500 residente ng bayan.
Isasagawa ang konsultasyon sa dalawang cluster. Para sa AMME cluster, gaganapin ang konsultasyon sa Barangay España na magsisilbing venue para sa mga residente ng Barangay Agtiwa, Barangay Mabini, Barangay Mabulo, at Barangay España. Para naman sa COCA cluster, isasagawa ang konsultasyon sa Barangay Taclobo at Barangay Azagra para sa mga residente ng Barangay Canjalon, Barangay Otod, Barangay Campalingo, at Barangay Azagra.
Batay sa impormasyon mula sa APMC, magsasagawa ng konsultasyon ang pribadong doktor at nurse na dadalhin sa bayan bilang bahagi ng aktibidad.
Layunin ng programa na makapagbigay ng serbisyong medikal sa mga residente, lalo na sa mga nangangailangan ng konsultasyon at pangunahing pagsusuri sa kalusugan.
Kinakailangan namang magdala ang mga lalahok ng barangay certificate o patunay ng paninirahan, valid ID, at medical prescription kung mayroon, upang makasama sa programa.
