Pinatitibay ng pamahalaan ang hakbang upang maiangat ang lalawigan ng Romblon bilang isa sa pangunahing destinasyon ng turismo sa bansa, kasunod ng pag-usad sa Kamara ng mga panukalang batas na naglalayong paunlarin ang iba’t ibang pasyalan sa probinsya.
Ayon kay Eleandro Jesus “Budoy” Madrona, naaprubahan sa ikalawang pagbasa ang siyam na panukalang batas na kanyang inakda na nakatuon sa deklarasyon at pagpapaunlad ng mga tourism at ecotourism sites sa lalawigan.
Sinabi ng mambabatas na nakikita niyang may malaking potensyal ang Romblon na makilala hindi lamang sa bansa kundi maging sa pandaigdigang antas, lalo na sa taglay nitong likas na yaman gaya ng mga dalampasigang may pinong puting buhangin at natatanging mga tanawin.
Samantala, inihayag din ni Madrona na makatutulong sa pagpapasigla ng turismo ang panukalang pagbuwag sa travel tax, na kamakailan ay naaprubahan na rin sa Kamara. Sa pamamagitan nito, inaasahang mas maraming Pilipino ang mahihikayat na bumiyahe dahil sa mas mababang gastos.
Iginiit ng kongresista na ang mga hakbang na ito ay bahagi ng mas malawak na layunin na mapalakas ang turismo at ekonomiya ng Romblon, at maitaguyod ito bilang isa sa mga nangungunang destinasyon sa bansa sa mga susunod na taon.
