Inihayag ni Romblon Congressman Eleandro Jesus Madrona na naaprubahan na sa ikalawang pagbasa sa Mababang Kapulungan ng Kongreso ang siyam na panukalang batas na naglalayong palakasin ang sektor ng turismo sa lalawigan ng Romblon.
Kabilang sa mga panukalang ito ang deklarasyon ng iba’t ibang lugar bilang tourism at ecotourism destinations, gayundin ang pagtatatag ng mga makasaysayan at likas na pook bilang mga tourism site.
Sa ilalim ng House Bills 1663 hanggang 1669 at 2928, iminungkahi ang pagtatatag ng Battle of the Sibuyan Sea Memorial Shrine sa Cajidiocan, Romblon, at ang deklarasyon ng mga kilalang destinasyon tulad ng Binucot Beach sa Ferrol, Romblon, Colong-Colong Beach sa Corcuera, Romblon, at ang buong bayan ng San Jose, Romblon o Isla de Carabao bilang tourism destination.
Kabilang din sa mga panukala ang pagdeklara sa Looc Bay sa Looc, Romblon bilang ecotourism destination, Payayasog Beach sa Corcuera bilang tourism destination, at ang Ruins of Cotta de San Jose at Siki It Elepante Rock Formation bilang tourism sites. Isinama rin ang deklarasyon sa San Fernando, Romblon bilang isang tourism development area.
Ayon kay Madrona, inaasahang maisasalang sa ikatlong pagbasa ang mga panukala sa pagbabalik ng sesyon ng Kongreso, bago ito ihain sa Senado para sa mga kaukulang counterpart bills.
Kapag naisabatas, inaasahang magbibigay ang mga panukalang ito ng mas malinaw na balangkas para sa pagpapaunlad, pangangalaga, at promosyon ng mga naturang destinasyon, gayundin ng mas malawak na oportunidad sa kabuhayan para sa mga lokal na komunidad.
Dagdag pa ng mambabatas, patuloy niyang isusulong ang pagpapatibay ng mga panukala upang maisakatuparan ang mas inklusibo at pangmatagalang pag-unlad ng turismo sa lalawigan.
