Nais amyendahan ni Cajidiocan Mayor Atty. Marvin Ramos ang kasalukuyang requirements para sa mga hikers na planong umakyat sa Mount Guiting-Guiting, kasunod ng isyu hinggil sa mga nakanselang tours na lumabas nitong nakalipas na linggo.
Sa panayam ng Romblon News Network noong Lunes, sinabi ni Ramos na balak niyang ihain ang usapin sa pulong ng Protected Area Management Board (PAMB) sa Marso 3.
Ayon sa alkalde, may mga kumakalat na guidelines sa social media kaugnay ng pag-akyat sa bundok, ngunit nilinaw niyang wala umanong dumaan at naaprubahan ng PAMB na bagong patakaran.
Isa sa mga nais niyang mabigyan ng pansin ay ang mahigpit na pagpapatupad ng rekisito na dapat ay may “two major climbs” sa loob ng nakalipas na anim na buwan bago payagang umakyat sa Guiting-Guiting. Aniya, nagiging mahirap itong sundin, lalo na para sa mga lokal na residente.
Ipinaliwanag ni Ramos na may mga taga-Romblon na may kakayahang akyatin ang bundok ngunit walang sapat na pondo upang umakyat muna sa iba pang bundok sa labas ng lalawigan upang matugunan ang naturang requirement.
Dagdag pa niya, lumalabas na kinakailangang umakyat muna sa bundok sa ibang probinsya ang isang lokal bago payagang akyatin ang sariling bundok sa kanilang lugar, bagay na nais niyang mapag-usapan at malinawan sa darating na pulong ng PAMB.
Discussion about this post