Itinampok ng Climate Change Commission (CCC) ang kahalagahan ng National Adaptation Plan (NAP) bilang pangunahing balangkas sa pagpapatibay ng mga hakbang laban sa epekto ng climate change sa lalawigan ng Romblon.
Sa pulong na pinangunahan ni Vice Chairperson at Executive Director Robert E.A. Borje kasama si Governor Trina Alejandra Firmalo-Fabic, binigyang-diin ang pag-align ng mga lokal na programa sa pambansang estratehiya sa pamamagitan ng NAP.
Ayon sa CCC, ang NAP ang magsisilbing gabay upang maging pangmatagalan, sistematiko, at nakabatay sa lokal na pangangailangan ang mga climate initiative ng lalawigan. Layunin nitong matiyak na ang mga plano at proyekto ng lokal na pamahalaan ay nakaangkla sa malinaw na direksyong pambansa.
Ang National Adaptation Plan, na binuo sa ilalim ng administrasyon ni Ferdinand R. Marcos Jr., ay nagsisilbing pambansang instrumento upang tugunan ang lumalalang climate risks at mabawasan ang kahinaan ng mga komunidad sa epekto ng pagbabago ng klima.
Binigyang-diin ni Borje na sa pamamagitan ng NAP, mas mapapalakas ang koordinasyon sa lahat ng antas ng pamahalaan upang maihatid ang mga solusyong tumutugon sa pangangailangan ng mga lokal na komunidad habang nakasunod sa pangmatagalang layunin ng bansa.
Sa ilalim ng NAP, tinutulungan ang mga lokal na pamahalaan na tukuyin ang angkop na climate actions, palakasin ang kanilang adaptive capacity, at bumuo ng mga programang magpoprotekta sa buhay, kabuhayan, at kalikasan.
Nanindigan ang CCC na patuloy itong magbibigay ng technical assistance at capacity-building support sa mga lokal na pamahalaan upang maisulong ang epektibong pagpapatupad ng National Adaptation Plan at makabuo ng mas matatag at climate-resilient na mga komunidad.
