Binigyang-diin ng mga kabataang lider mula sa Magdiwang, Romblon ang mahalagang papel ng mga bundok at kagubatan bilang natural na depensa laban sa epekto ng climate change sa pagbisita ng Climate Change Commission (CCC) sa Mount Guiting-Guiting sa Sibuyan Island.
Sa isinagawang talakayan, ipinaliwanag ng mga kabataan na ang Mount Guiting-Guiting ay nagsisilbing mahalagang panangga ng mga komunidad laban sa mas malalakas na bagyo at matitinding kondisyon ng panahon.
“Ang Mount Guiting-Guiting ay hindi lamang bundok na hinahangaan; ito ay buhay na panangga ng Sibuyan Island, tahimik ngunit matatag ang tindig na lumalaban sa nagbabagong klima para sa kinabukasan ng susunod na henerasyon,” pahayag ni Ann Mari Roda, isang youth leader mula sa Magdiwang.
“Tumutulong itong mag-regulate ng tubig-ulan at pumipigil sa matinding pagbaha at pagguho ng lupa. Nagsisilbi rin itong harang laban sa malalakas na hangin ng bagyo,” dagdag pa niya.
Bahagi rin ng aktibidad ang pagpapalakas ng papel ng kabataan sa pagbuo ng mga inisyatibang pangkomunidad na nakatuon sa climate resilience. Bilang bahagi ng pagbisita, nagsagawa rin ng tree-growing activity ang mga kalahok bilang suporta sa mga solusyong nakabatay sa kalikasan at upang mapalakas ang pangangalaga sa lokal na ekosistema.
Pinuri naman ni CCC Vice Chairperson at Executive Director Robert E.A. Borje ang mga kabataan sa kanilang kamalayan at aktibong pakikilahok sa pangangalaga ng kalikasan.
Ayon kay Borje, mahalaga ang papel ng mga kabataan sa pagpapalaganap ng kultura ng kahandaan at pangangalaga sa kalikasan sa antas ng komunidad.
Ipinaliwanag din niya na ang mga bundok tulad ng Mount Guiting-Guiting ay may mahalagang papel sa pagtugon sa climate change dahil nagsisilbi itong natural na panangga at tumutulong sa pagpapahina ng malalakas na hangin, pagpapatatag ng lupa, at pagsipsip ng tubig-ulan na nakababawas sa panganib ng pagbaha at landslide.
Dagdag pa niya, ang malusog na kagubatan ay nagsisilbing carbon sink na sumisipsip at nag-iimbak ng greenhouse gases habang tumutulong sa regulasyon ng temperatura at pagbabawas ng init sa kapaligiran.
Bahagi ang naturang aktibidad ng patuloy na programa ng Climate Change Commission upang palakasin ang kaalaman ng mga komunidad sa usapin ng climate change, isulong ang pangangalaga sa kalikasan, at hikayatin ang partisipasyon ng iba’t ibang sektor kabilang ang kabataan sa mga hakbang para sa climate action sa bansa.
