Naniniwala si Romblon Governor Trina Alejandra Firmalo-Fabic na malaking tulong sa ekonomiya, turismo, at serbisyong pangkalusugan ng lalawigan ang bagong ruta ng barko na bumibiyahe sa pagitan ng Malbog Port sa Looc at Caticlan, Aklan.
Sa kanyang mensahe sa pagbubukas ng bagong biyahe ng barko ng Montenegro Shipping Lines, sinabi ng gobernador na mas mapapalakas nito ang koneksyon ng Romblon sa isla ng Panay.
Ayon kay Fabic, hindi lamang sa kalakalan at turismo makikinabang ang lalawigan kundi maging sa iba pang mahahalagang serbisyo.
“Ang biyahe ng barkong ito ay magpapadali ng connectivity ng Romblon as well as Panay. Na-envision po natin na hindi lang ito economic ang benefits maging sa tourism, a lot of connectivities,” pahayag ng gobernador.
Ibinahagi rin niya na kasalukuyang nakikipag-ugnayan ang pamahalaang panlalawigan sa ilang ospital sa Kalibo at Iloilo upang magkaroon ng partnership sa larangan ng serbisyong medikal.
Ayon sa kanya, malaking tulong ang pagkakaroon ng regular na biyahe ng barko lalo na sa mga pagkakataong kailangang ilipat sa ibang ospital ang mga pasyente mula sa Romblon.
Hinimok din ng gobernador ang mga Romblomanon na suportahan at tangkilikin ang bagong ruta upang matiyak na magpapatuloy ang operasyon nito.
Tiniyak din ni Fabic na magiging mas komportable ang biyahe para sa mga pasahero, lalo na sa mga turistang bibisita sa lalawigan.
