Dalawang magkasunod na araw na nakaranas ng magkahiwalay na pagbaha ang isla ng Sibuyan sa lalawigan ng Romblon dahil sa umiiral na shear line na nagdulot ng malakas na pag-ulan sa iba’t ibang bahagi ng probinsya.
Sa bayan ng Magdiwang nitong Linggo, muntik nang umapaw ang mga ilog habang ilang bahay naman ang nalubog sa baha. Ayon kay Magdiwang MDRRMO Rolan Paniagua, madaling araw nang magsimulang umulan at napansin ang pagtaas ng tubig bandang umaga. Agad naman aniyang humupa ang tubig matapos ang ilang oras, bagamat may mga kalsadang pansamantalang binaha.
Nitong Lunes, muling nakaranas ng malakas na ulan sa bayan at bandang alas-7 ng umaga ay tumaas muli ang tubig sa mga ilog dahil sa tuloy-tuloy na pag-ulan. Humupa rin ang tubig makalipas ang halos tatlong oras.
Bilang pag-iingat, kinansela ang pasok mula Kindergarten hanggang Senior High School sa Magdiwang nitong Lunes dahil sa masamang panahon.
Sa bayan naman ng Cajidiocan, nakaranas din ng pagbaha sa ilang lugar matapos umapaw ang mga spillway. Kabilang sa binaha ang barangay road sa Sitio Cantipyang, Barangay Danao.
Ayon sa isang residente na nakatira malapit sa spillway, nagsimulang rumagasa ang tubig madaling araw ng Lunes. Aniya, mas maliit ang baha kumpara sa mga nakaraang insidente na umabot hanggang sa loob ng kanilang bahay ang tubig.
