Umani ng reaksiyon sa social media si Ferdinand Dela Merced o mas kilala bilang Philippine Looper matapos ang kanyang Facebook post matapos hindi siya payagang makaakyat sa Mount Guiting-Guiting Natural Park.
Sa kanyang post, sinabi ni Dela Merced na hindi umano siya pinayagang umakyat ng bundok dahil sa kakulangan ng requirements. Sa parehong pahayag, binanggit niya na maaari na lamang niyang isabay paakyat ng summit ang Protected Area Superintendent upang “lumiit ang tiyan nito,” na tinutukoy si PASU Joybert Mijares.
Nanawagan din si Dela Merced kay Trina Firmalo-Fabic at kay Pangulong Ferdinand Marcos Jr. na aksyunan ang kanyang hinaing. Ayon sa kanya, kinakawawa umano ng PASU ang mga lokal sa Sibuyan at nasisira ang turismo ng isla.
Mariin namang itinanggi ni Mijares ang alegasyong sinisira nito ang turismo ng Sibuyan.
Ayon sa kanya, nagkaroon sila ng pag-uusap ni Dela Merced at ipinaliwanag ang mga kailangang isumite tulad ng medical certificate, patunay ng dalawang major climbs, at iba pang rekisito bago payagang umakyat.
“Isa pa, sinabi ko sayo na pasensya na at di kita mapapayagan dahil kung papayagan kita na walang requirements ay papayagan ko na lahat kung ganun. Tayo po ay patas sa lahat ng bagay, susundin natin ang lahat ng protocols para sa kabutihan at kaligtasan ng lahat,” pahayag ni Mijares.
“Hindi ko po sinisira ang turismo ng Romblon, inaayus natin ito para sa kaligtasan ng lahat,” dagdag pa nito.
Kasunod ng palitan ng pahayag, may ilang netizen at Romblomanon ang nanawagan sa social media na ideklarang persona non grata si Philippine Looper dahil umano sa kanyang asal at naging pahayag laban sa opisyal ng protected area.
Discussion about this post