Binabantayan ngayon ng Provincial Health Office ang pagtaas ng kaso ng dengue sa Sibuyan Island matapos makapagtala ng kabuuang 45 kaso ngayong buwan ng Pebrero, kung saan lahat ng pasyente ay gumaling na.
Sa tala, 21 kaso ang naitala sa bayan ng Magdiwang, 15 sa Cajidiocan, at 9 sa San Fernando.
Sa ginanap na Kapihan sa PIA Romblon, sinabi ni Provincial Health Officer Dr. Renato Menregi Jr. na bagama’t naka-recover ang mga pasyente, patuloy na minomonitor ang sitwasyon.
Ipinaliwanag ni Menregi na ang pagdami ng kaso ay may kaugnayan sa pagdami ng lamok, lalo na kung may mga lugar na may naipong tubig na nagiging pamugaran ng mga ito.
Ayon sa opisyal, posibleng nakadagdag sa pagdami ng breeding sites ang sunod-sunod na pag-ulan at pagbaha na nag-iiwan ng mga lugar na may naipong tubig kung saan maaaring mangitlog ang mga lamok na nagdadala ng dengue.
“Ito ang ating pinapaalala sa mga LGUs na laging obserbahan ang 5S stragegies para maiwasan ‘yung pagdami ng kaso sa probinsya hindi lang sa Sibuyan.”
Ang 5S strategy laban sa dengue ay kinabibilangan ng paghahanap at pagsira sa mga pinamumugaran ng lamok, pagsasagawa ng personal na proteksiyon tulad ng paggamit ng kulambo at repellent, agarang pagpapatingin sa doktor kapag may sintomas, pakikiisa sa fogging kung may outbreak, at pagpapanatili ng sapat na pag-inom ng tubig.
Kabilang sa mga sintomas ng dengue ang mataas na lagnat, pananakit ng ulo, pananakit ng kasu-kasuan at kalamnan, rashes, pagdurugo ng gilagid o ilong, at sa malalang kaso ay maaaring magdulot ng matinding pagdurugo at pagbaba ng platelet count.
Pinayuhan ng opisyal ang publiko na huwag balewalain ang mga sintomas at agad na magpatingin sa pinakamalapit na ospital o health center para sa agarang pagsusuri at gamutan.
Patuloy naman ang paalala ng Provincial Health Office sa mga lokal na pamahalaan at komunidad na panatilihin ang kalinisan sa kapaligiran, alisin ang mga naipong tubig, at sundin ang mga hakbang sa pag-iwas sa dengue upang hindi na madagdagan pa ang mga kaso sa mga susunod na linggo.
