Hinikayat ni Governor Trina Firmalo-Fabic ang mga lokal na opisyal at iba’t ibang sektor na maging mas maagap at sistematiko sa pagharap sa epekto ng climate change at mga kalamidad sa ginanap na Provincial Climate and Disaster Resilience Summit sa Sanctuary Garden Resort sa Tampayan, Magdiwang, Sibuyan Island.
Sa kanyang mensahe, binigyang-diin ng gobernador na bilang isang archipelagic province, likas na bulnerable ang Romblon sa iba’t ibang sakuna, lalo na sa sunod-sunod na bagyo at matitinding pag-ulan na naranasan sa mga nakalipas na taon.
Ayon kay Fabic, kung susuriin ang mga naging programa ng pamahalaan nitong mga nakaraang taon, kadalasang nakatuon ang mga ito sa pagtugon sa krisis matapos itong mangyari.
“Kung mapapansin ninyo, mostly we have been trying to mitigate ‘yung sa mga crisis after crisis. Last year, sunod-sunod ang typhoons, and all we are doing is trying to figure out how we could protect our people,” pahayag ng gobernador.
Giit niya, panahon na upang maging mas proactive ang lalawigan sa halip na laging reaktibo sa tuwing may sakuna.
“This time, what we want to do is to be more proactive na bago pa man dumating ang mga sakunang ito, napag-usapan na natin ‘yung gusto nating mangyari pagdating sa climate change adaptation and resiliency,” aniya.
Ipinaliwanag din ni Fabic na ang resiliency ay hindi lamang kakayahang magtiis o magpatuloy sa gitna ng paghihirap, kundi ang kakayahang maglatag ng konkretong hakbang upang hindi lamang makabangon kundi mas mapalakas pa ang mga komunidad.
Binigyang halimbawa ng gobernador ang mga imprastraktura sa ibang bansa tulad ng Japan, kung saan malalalim at malalawak ang drainage system na nagsisilbing proteksyon laban sa baha at nagiging imbakan pa ng tubig sa panahon ng kakulangan.
Aniya, dapat pag-aralan kung anong mga polisiya at imprastraktura tulad ng breakwater at flood control projects ang maaaring iangkop at ipatupad sa Romblon.
Hinamon din ni Fabic ang mga Municipal Disaster Risk Reduction and Management Officers (MDRRMO), Municipal Planning and Development Officers (MPDO), Municipal Environment and Natural Resources Officers (MENRO), at mga Local Chief Executives (LCE) na isama sa bawat plano at programa ng kani-kanilang bayan ang malinaw na component para sa climate change adaptation at resiliency.
“Ibig sabihin, sa bawat plano, program at polisiya na ginagawa natin, posible kayang palaging may component about climate change and resiliency,” saad ng gobernador.
Target ng tatlong araw na summit ang pagbuo ng isang nine-year provincial climate and disaster resilience plan na magsisilbing gabay ng mga munisipyo sa pagpapalakas ng kani-kanilang kakayahan laban sa mga banta ng kalamidad at epekto ng nagbabagong klima. (with reports from Heico Ramilo)
