Inanunsyo ni Pangulong Ferdinand R. Marcos Jr. ang pagkakatuklas ng malaking natural gas field sa Malampaya East 1 (MAE-1). Ito ang kauna-unahang malaking discovery sa loob ng mahigit isang dekada.
Ayon sa Pangulo, ang nadiskubreng reservoir ay may layong limang kilometro sa silangan ng kasalukuyang Malampaya field at may tinatayang 98 bilyong cubic feet ng natural gas.
“Katumbas nito ang halos 14 na bilyong kilowatt-hour ng kuryente sa isang taon. Ibig sabihin, makakapag-supply ito ng kuryente sa mahigit 5.7 milyong kabahayan, 9,500 na gusali, o halos 200,000 paaralan sa loob ng isang taon,” pahayag ng Pangulo sa isang mensahe na nilabas sa kanyang social media account.
Binigyang-diin ni Pangulong Marcos na makatutulong ang MAE-1 sa Malampaya at magpapalakas sa suplay ng gas ng bansa.
Batay sa paunang testing, may nakuhang 60 million cubic feet kada araw na natural gas mula sa nadiskubreng reservoir.
Ibig sabihin, may potensiyal itong magbigay ng mas maraming natural gas na tulad ng orihinal na mga Malampaya well.
Bukod sa natural gas, kasama rin anya sa natuklasan ang condensate, isang mataas na grado na likidong fuel, na makatutulong sa pagsisikap ng pamahalaan para mapatatag ang supply ng kuryente sa bansa.
“Ipinagmamalaki rin natin na Pilipino ang nanguna sa drilling na ito.Higit sa lahat, natapos nila ito nang walang aksidente o insidenteng pangkapaligiran,” dagdag ng Pangulo.
Ang MAE-1 ang unang milestone sa ilalim ng Malampaya Phase 4 Drilling Campaign, na kinabibilangan din ng Camago-2 at Bagong Pag-asa wells.
Matapos Ang MAE-1, susunod ang pagkumpleto at pagsubok sa Camago-3 na susundan ng drilling ng Pag-asa exploration well upang tuklasin ang iba pang potensyal na reserbang gas.
Ayon sa Pangulo, naging posible ang tagumpay sa pamamagitan ng pagtutulungan ng SC 38 Consortium na pinangungunahan ng Prime Energy Resources Development B.V. katuwang ang UC38, PNOC Exploration Corporation, at Prime Oil and Gas Inc.
Dagdag pa niya, “Patunay ito na sa responsableng pangangalaga sa kalikasan at matibay na pagtutulungan ng gobyerno at pribadong sektor, makakamit natin ang mas maaasahang suplay ng enerhiya para sa bawat Pilipino.”
Ang Malampaya gas field sa baybayin ng Palawan ay matagal nang nagsisilbing haligi ng seguridad sa enerhiya ng bansa bilang pangunahing pinagkukunan ng lokal na natural gas at mahalagang tagapag-ambag sa supply ng kuryente sa Luzon. (PR)
