Nagpaalala ang Bureau of Jail Management and Penology (BJMP) Regional Office MIMAROPA sa publiko, lalo na sa mga nagnanais mag-aplay sa ahensya, na mag-ingat laban sa mga recruitment scam at mga indibiduwal na nagpapakilalang fixer kapalit ng pera.
Ayon kay BJMP MIMAROPA spokesperson Jail Officer 3 Joefrie Anglo, malinaw na libre at merit-based ang aplikasyon sa BJMP at dumaraan ito sa mahigpit at pamantayang proseso. Matapos ang regional-level assessment, ang mga kwalipikadong aplikante ay isinusumite sa BJMP national headquarters para sa pinal na pagsusuri at pag-apruba.
Binigyang-diin ni Anglo na anumang paniningil o pangakong makakapasok sa BJMP kapalit ng pera ay malinaw na panlilinlang. Hinikayat niya ang publiko na huwag pansinin ang mga fixer o sinumang nagsasabing may koneksyon sa loob ng ahensya.
Ipinaliwanag din ng BJMP na ang mga opisyal na anunsyo para sa 2026 recruitment ay ilalabas lamang sa pamamagitan ng awtorisadong human resource offices at opisyal na communication channels ng ahensya. Bukas ang aplikasyon para sa Jail Officer 1 hanggang Enero 30, 2026.
Layunin ng BJMP na madagdagan ang kanilang hanay ng mga kawani, na sa kasalukuyan ay may 679 personnel na nangangasiwa sa 2,063 Persons Deprived of Liberty (PDLs) sa 19 na jail facilities sa buong rehiyon ng MIMAROPA.
Ang proseso ng pagpili ay kinabibilangan ng Recruitment Competency Test, panel interview, at document verification na isinasagawa ng Human Resource Development Division (HRDD) katuwang ang mga intelligence units. Kailangang sumailalim din ang mga aplikante sa medical, dental, at neuropsychiatric examinations.
Dagdag pa ni Anglo, hindi awtorisado ang sinumang BJMP personnel, kabilang ang mga nakatalaga sa jail facilities at medical units, na maglabas ng listahan ng mga kwalipikadong aplikante sa labas ng opisyal na daluyan. Hinikayat naman ang publiko na i-report agad ang anumang kahina-hinalang aktibidad kaugnay ng recruitment scam sa grievance mechanisms ng BJMP upang mapanatili ang integridad ng proseso. (PR)
