Nagkaloob ang Department of Energy (DOE) ng Mobile Energy System (MES) sa Pag-asa Island Integrated School sa munisipalidad ng Kalayaan, West Philippine Sea, bilang pagtupad sa direktiba ni Pangulong Ferdinand R. Marcos Jr. na maihatid ang kuryente lalo na sa mga malalayong lugar sa bansa.
Ayon kay Presidential Communications Office Undersecretary at Palace Press Officer Claire Castro, pinangunahan ni DOE Secretary Sharon Garin ang pamamahagi ng MES upang matiyak na may maaasahang suplay ng kuryente ang paaralan na matagal nang nahihirapang magkaroon ng enerhiya.
Bukod dito, tumanggap din ang paaralan ng sampung parol o Christmas lanterns mula sa iba’t ibang Technical Education and Skills Development Authority (TESDA) centers sa bansa bilang bahagi ng pamaskong handog ng pamahalaan.
Binanggit ni Castro na sa ilalim ng administrasyon ni Pangulong Marcos, layunin ng gobyerno na masiguro ang mas maliwanag na kinabukasan para sa lahat ng kabataan, saan mang bahagi ng bansa sila naroroon.
Ang Mobile Energy System ay isang renewable energy source na maaaring gamitin sa mga micro-grid, negosyo, pasilidad pangkalusugan, paaralan, at kabahayan. Isa rin itong ligtas, maaasahan, at sustenableng alternatibong pinagkukunan ng kuryente na mahalaga sa oras ng sakuna at emergency, lalo na kapag pumalya ang tradisyunal na suplay ng enerhiya.
