Magbabalik na ang pinaka sikat at exciting na liga ng basketball sa buong mundo. Ito ay sa muling pagbubukas ng bagong season ng National Basketball Association 2025 – 2026 sa October 22, 2025.
Sa Opening Night, dalawang laban ang naganap. Una rito ang defending champions Oklahoma City Thunder (OKC) kontra sa Houston Rockets, na nagsilbi ring championship ring ceremony para sa Thunder matapos ang matagumpay nilang kampanya noong nakaraang season.
Halos walang nabago sa line-up ng OKC Thunder, na pinangunahan pa rin ng kanilang MVP Shai Gilgeous-Alexander, kasama sina Alex Caruso, Chet Holmgren, Lu Dort, Jaylen Williams, at Isaiah Hartenstein sa ilalim ng patnubay ni Coach Mark Daigneault. Sa panig naman ng Houston Rockets, nanguna sina Alperen Sengun, Amen Thompson, Fred VanVleet, Jae’Sean Tate, Jabari Smith, at ang mga bagong lipat na sina Dorian Finney-Smith at Kevin Durant.
Kasunod nito ay ang mainit na sagupaan ng Los Angeles Lakers at Golden State Warriors. Para sa Lakers, nariyan pa rin ang tambalan nina LeBron James at Luka Dončić. Bagamat hindi nakalaro si LeBron sa preseason, tiniyak niyang makakalaro siya sa opening game kontra Warriors. Kabilang din sa kanilang line-up sina Austin Reaves, Rui Hachimura, Dalton Knecht, at mga bagong lipat na sina DeAndre Ayton, Jake LaRavia, at Marcus Smart. Samantala, sa Golden State Warriors, muling pinangunahan ng beteranong si Stephen Curry ang koponan kasama sina Jimmy Butler, Draymond Green, Jonathan Kuminga, Buddy Hield, at ang mga bagong miyembro na sina Al Horford at Seth Curry, kapatid ni Steph.
Noong sumunod na araw, Oktubre 23, itinuloy ang mga laro sa iba’t ibang lungsod na kinabibilangan ng New York Knicks vs Cleveland Cavaliers, Brooklyn Nets vs Charlotte Hornets, Toronto Raptors vs Atlanta Hawks, Detroit Pistons vs Chicago Bulls, New Orleans Pelicans vs Memphis Grizzlies, Washington Wizards vs Milwaukee Bucks, LA Clippers vs Utah Jazz, San Antonio Spurs vs Dallas Mavericks, Minnesota Timberwolves vs Portland Trail Blazers, at Sacramento Kings vs Phoenix Suns.
Maraming koponan ang nagpalakas ng kanilang mga line-up ngayong season. Isa rin sa mga inaabangang elemento ay ang pagpasok ng mga bagong rookies, kabilang ang Top 3 picks. Si Cooper Flagg ay napili ng Dallas Mavericks at sasabak kasama sina Anthony Davis, Klay Thompson, at Kyrie Irving. Si Dylan Harper naman ay napunta sa San Antonio Spurs na makakasama nina Victor Wembanyama, Rookie of the Year Stephon Castle, at De’Aaron Fox. Si Harper ay anak ng NBA legend na si Ron Harper at may dugong Pilipino sa panig ng kanyang ina. Samantala, si VJ Edgecombe ay kinuha ng Philadelphia 76ers at maglalaro kasama sina Joel Embiid, Paul George, at Tyrese Maxey.
Bukod sa mga pagbabago sa roster, isa rin sa pinakamalaking pagbabago ngayong taon ay ang paglipat ng TV network ng NBA. Mula sa TNT Network, muling bumalik ang NBA sa NBC Network, na naging tahanan ng liga noong dekada 80 at 90. Mapapanood din ito sa Peacock, Amazon Prime Video, ESPN, ABC, at NBA TV.
Sa Pilipinas, mapapanood ang mga laro sa NBA TV Philippines at One Sports, na patuloy na magdadala ng pinakabagong aksyon mula sa NBA court patungo sa mga tahanan ng mga Filipino basketball fans.
