Idineklara nang negatibo sa African Swine Fever (ASF) ang bayan ng San Andres ilang linggo matapos na makapagtala ng positibong kaso ng virus, ayon sa Municipal Agriculture Office.
Batay sa inilabas na sertipikasyon ng Bureau of Animal Industry (BAI), nagnegatibo sa confirmatory laboratory tests ang mga baboy mula sa mga barangay ng Agpudlos, Linawan, Calunacon, Poblacion, Pag-Alad, Juncarlo, Marigondon Norte at Sur, Doña Trinidad, Mabini, Tanagan, Victoria, at Matutuna.
Ang pagsusuri ay isinagawa ng Animal Disease Diagnosis and Reference Laboratory upang tiyakin ang resulta ng mga naunang ulat ng pagkakaroon ng ASF. Mananatiling valid ang ASF-free status ng bayan hanggang November 04, at magsasagawa muli ng panibagong pagsusuri matapos ang petsang ito.
Kapag idineklarang ASF-free ang isang LGU, maaari nang makapag-transport ng mga baboy lampas sa lokal na hangganan at labas ng probinsya, basta’t masusunod ang mga requirement ng BAI, kabilang ang pagkakaroon ng aktibong surveillance.
Gayunpaman, nananatili pa rin ang umiiral na kautusan ni Governor Trina Firmalo-Fabic na nagbabawal sa pagpasok ng pork products sa buong lalawigan. Batay ito sa naunang pagkakaroon ng ASF case sa San Andres, kaya’t kahit ASF-free na ang bayan, hindi pa rin inaalis ang provincial ban.
