Itinuro ng Department of Budget and Management (DBM) MIMAROPA ang aberya sa procurement process bilang pangunahing dahilan kung bakit nakakuha ng mababang marka ang Romblon State University (RSU) sa 2024 Agency Performance Review (APR).
Batay sa ipinadalang paliwanag ng DBM sa Romblon News Network, bumagsak ang RSU sa performance review matapos magkaroon ng failure of bidding noong 2024 sa itatayong Smart Campus Data Security at Cyberattack Prevention Hub na nagkakahalaga ng P750 milyon. Bagama’t naisagawa na ang bidding para rito, hindi ito na-award, dahilan upang hindi magamit ang malaking bahagi ng pondo.
Sa hiwalay na pahayag sa Romblon News Network, sinabi ni Romblon State University President Merian Mani na nitong Enero ay muling na bid ang proyekto at meron nang nanalong kontraktor. Ipinaliwanag nito na nag-iingat sila sa pag-bid dahil sa bigating proyekto umano ito at iniiwasang magkamali.
Paliwanag pa ng DBM, 73.58% lamang ng kabuuang pondo ang nagamit ng RSU. Sa aspeto ng disbursement, 70.17% lamang ng mga obligasyon ang nailabas dahil sa mga hindi pa natatapos na infrastructure projects, kakulangan ng billing statements, at hindi pa nadideliver na supplies.
Sa physical performance, natupad ng RSU ang 9 lamang mula sa 14 na target sa ilalim ng kanilang major programs kagaya ng Higher Education Program, Advanced Education Program, Research Program, at Technical Advisory and Extension Program.
Sinabi ng DBM na ilan sa mga dahilan ay ang hirap sa pagtunton sa alumni at ang pagpili ng mga estudyante na mag-enroll sa mga programang hindi prayoridad o walang thesis component.
Dagdag pa rito, mababa din ang RSU pagdating sa timeliness at kalidad ng report submissions sa DBM.
Bagama’t nakapagsumite ito ng mga ulat sa DBM Apps Portal, nabigo ang unibersidad na magsumite ng URS-generated report na pirmado ng pinuno ng institusyon, alinsunod sa itinakdang guidelines ng COA-DBM Joint Circular No. 2019-1. Naipadala lamang umano ang mga dokumento bilang attachment sa mga kahilingan ng pondo, ngunit lampas na ito sa itinakdang deadline.
Nilinaw ng DBM na ang APR ay hindi parusa kundi mekanismo upang masukat ang performance ng mga ahensya at matukoy ang mga aspeto na dapat pag-ibayuhin sa paggamit ng pondo at pagpapatupad ng mga proyekto.
Nauna nang sinabi ni Budget Secretary Amenah Pangandaman na tutulungan nila ang mga institusyong nakakuha ng mababang grado upang matukoy ang mga pagkukulang, partikular sa procurement processes at project planning.
