Inanunsyo ng National Bureau of Investigation (NBI) MIMAROPA na magsisimula nang mag-operate nang tuloy-tuloy ang NBI Clearance Center sa bayan ng San Agustin, Romblon upang mas mapalapit ang serbisyo sa mga Romblomanon.
Ayon sa opisyal na pahayag ng ahensya, simula Lunes, Agosto 26, ay bukas na ang naturang center mula alas-8 ng umaga hanggang alas-5 ng hapon, Lunes hanggang Biyernes.
Layon ng pagbubukas na ito na mabigyan ng mas mabilis at mas maginhawang access ang mga residente ng Romblon, lalo na yaong mga kailangang kumuha ng NBI clearance bilang rekisito sa pag-aapply ng trabaho, negosyo, pasaporte, o iba pang legal na transaksyon.
Para sa mas maayos na proseso, binigyang-diin ng NBI na maaaring pumili ang publiko kung nais nilang mag-walk-in o magpa-schedule online sa opisyal na website ng ahensya. Sa pamamagitan nito, masisiguro na hindi siksikan ang mga aplikante at magiging mas organisado ang pagproseso ng mga clearance.
Inaasahan din ng NBI MIMAROPA na makababawas ito sa gastusin at oras ng mga aplikante, dahil hindi na nila kinakailangang bumiyahe pa sa ibang probinsya gaya ng Oriental Mindoro para lamang makakuha ng clearance.
Ang pagbubukas ng NBI Clearance Center sa Romblon ay bahagi ng patuloy na hakbang ng ahensya upang dalhin nang mas malapit sa mamamayan ang kanilang mga serbisyo, alinsunod sa mandato na gawing mas episyente at accessible ang mga pangunahing proseso ng pamahalaan.
