Nakatanggap ng malaking tulong ang mga magsasaka ng bayan ng Alcantara matapos ipagkaloob ng Department of Agriculture (DA) sa ilalim ng Special Area for Agricultural Development (SAAD) Program ang isang four-wheel tractor na nagkakahalaga ng ₱1.42 milyon.
Ang makinaryang ito ay opisyal na tinanggap ng Suong Farmers Association, na nagsabing ito ang kauna-unahang malaking traktora na napunta sa kanilang grupo at kauna-unahan ding ipinagkaloob ng DA sa buong MIMAROPA.
Ayon sa DA-SAAD MIMAROPA, ang nasabing traktora ay hindi lamang makikinabang ang Suong Farmers Association, kundi pati ang iba pang samahang tinutulungan ng programa sa bayan ng Alcantara. Layunin ng interbensyon na mapagaan ang trabaho ng mga magsasaka, lalo na sa kanilang mga maisan, at mapabilis ang produksyon.
Labis ang pasasalamat ng asosasyon, sa pangunguna ng kanilang pangulo na si Margie Miñano.
“Sa DA-SAAD MIMAROPA, maraming salamat po. Malaking bagay po ang ibinigay [ninyo] sa Suong Farmers Association. Kung wala po ito, hirap na hirap po talaga kami sa pagtatanim. Gagawin po namin lahat, andito na po ‘yong traktora na ito,” pahayag ni Miñano.
Samantala, isinailalim ang mga kasapi ng asosasyon sa pagsasanay upang matiyak ang wastong paggamit at maintenance ng makinarya. Plano rin nilang magtalaga ng opisyal na operator at iparenta ang traktora upang magkaroon ng dagdag na kita para sa kanilang grupo.
