Sa gitna ng dayalogo kasama ang mga opisyal ng Romblon State University (RSU) at mga estudyanteng bumalik mula sa summer enrichment camp sa Dalhousie University sa Canada, muling ipinahayag ni Congressman Budoy Madrona ang kanyang matagal nang layunin: ang mabigyan ng de-kalidad na edukasyon ang kabataang Romblomanon.
Ayon kay Madrona, ang kanyang walang-sawang suporta sa RSU ay may iisang layunin—ang ihanda ang mga kabataan ng lalawigan upang maging kapaki-pakinabang na mamamayan at katuwang sa pagpapaunlad ng Romblon.
“And why did I exert that effort? Because I want our students—kayo—to be given the best education, comparable, if possible, to the best universities in the Philippines,” ayon kay Madrona.
“Because I want the youth of Romblon to be like me—fully educated—so you can be assets in the development of our beloved province,” dagdag pa nito.
Ayon sa kanya, kabilang sa mga sinusuportahang inisyatibo ang pagbibigay ng oportunidad sa mga estudyante ng RSU na makaranas ng international exposure sa mga partner institutions tulad ng Dalhousie University.
Ang pahayag ni Madrona ay bahagi ng programa ng RSU na tumatarget sa pagpapalawak ng kaalaman at kasanayan ng mga mag-aaral sa larangan ng agrikultura, agham, at iba pang kursong may kaugnayan sa lokal na pag-unlad.
