Muling naghigpit ang ilang lokal na pamahalaan sa Tablas Island, Romblon laban sa African Swine Fever (ASF) matapos makumpirma ang isang kaso sa Barangay Tan-agan, San Andres.
Sa Calatrava, inanunsyo ng lokal na pamahalaan na maglalagay muli ng checkpoint simula Agosto 15 upang harangin ang mga baboy na papasok mula sa karatig-bayan. Hiniling din nila sa mga transporter na mahigpit na sumunod sa itinakdang alituntunin para mapanatiling ligtas ang hog industry sa bayan.
Sa Odiongan naman, nagpatupad na ng checkpoint sa mga pangunahing entry point noong Agosto 8 matapos ipag-utos ni Mayor Roger Fodra bilang hakbang para maprotektahan ang kanilang mga alagang baboy.
Bagama’t wala pang opisyal na pahayag mula sa pamahalaang panlalawigan, ayon sa source ng Romblon News Network, nakatakdang magsagawa ng panibagong testing sa ilang baboy sa Barangay Tan-agan upang muling makumpirma ang naunang napaulat na kaso.
