Muling isinusulong ng lokal na pamahalaan ng Calatrava, Romblon ang pagpapalakas ng sektor ng turismo sa ilalim ng panunungkulan ng nagbabalik na alkalde na si Mayor Robert Fabella.
Sa isang panayam ng Romblon News Network, binigyang-diin ni Fabella na pangunahing prayoridad ng kanyang administrasyon ang pagbuhay at pagpapayabong ng turismo ng bayan, na inaasahang magbubukas ng mas maraming oportunidad sa kabuhayan at trabaho para sa mga mamamayan.
Isa sa mga unang hakbang ng administrasyon ni Fabella ay ang pagsisimula ng konstruksyon ng isang modernong passenger terminal building sa bayan. Ayon sa alkalde, malaking tulong ito upang mapadali ang pagpasok at paglabas ng mga turista sa Calatrava sa pamamagitan ng mga pantalan.
“Kapag may maayos na terminal, tiyak mas dadami pa ang mga bibisita. Kailangan natin ng imprastrukturang kaaya-aya sa mga turista,” pahayag ng alkalde.
Sa kasalukuyan, tinatayang umaabot na sa 300 katao kada araw ang dumadayo sa mga kilalang pasyalan ng Calatrava gaya ng Lapus-Lapus Cove, Tinagong Dagat, at ilang lokal na kainan.
Layunin ngayon ng lokal na pamahalaan, sa pangunguna ng binuong tourism team ni Fabella, na maitaas ang bilang ng daily visitors sa 500 katao, hindi lang mga lokal kundi maging mga turista mula sa karatig-lalawigan.
Bukod sa mga pasilidad at promosyon, abala na rin ang tourism office ng bayan sa paggawa ng comprehensive tourism map na magsisilbing gabay sa mga turista upang matukoy ang mga destinasyon at aktibidad na maaaring subukan sa Calatrava.
“Inaayos na natin ang tourism map para mas madaling malaman ng mga bisita kung saan pwedeng pumunta, anong mga tour packages ang available, at ano ang best experiences sa Calatrava,” dagdag pa ni Fabella.
Maliban dito, hinikayat din ng alkalde ang mga lokal na negosyante, transport groups, at mga may-ari ng pasyalan na makiisa sa kanilang layunin upang gawing mas kilala at mas progresibo ang turismo ng bayan.
