Aabot sa 102 pamilyang naapektuhan ng bagyong Kristine noong 2024 ang tumanggap ng financial assistance mula sa Department of Human Settlements and Urban Development (DHSUD) MIMAROPA ngayong August 12.
Ayon sa San Andres Public Information Office, ang mga benepisyaryo ay may mga bahay na bahagyang nasira kaya tumanggap sila ng tig-P10,000 kada pamilya bilang tulong mula sa pamahalaan sa ilalim ng Emergency Shelter Support ng Integrated Disaster Shelter Assistance Program ng DHSUD sa pangunguna ni Regional Director Benleo Jarangue ng DHSUD MIMAROPA
Personal na inabot ang tulong upang makatulong sa muling pagpapatayo ng kanilang mga tahanan na nasira dahil sa kalamidad.
Sa isang pahayag, sinabi ni San Andres Mayor Fernald Rovillos na malaking tulong ang naibigay ng gobyerno sa mga pamilyang nasalanta.
“Masasabi nating, it’s better late than never. Ang mahalaga ay dumating ang tulong sa oras na kailangan ng tao. Sa panahon ng sakuna, ito ang isa sa mga pinaka-kailangang suporta ng ating mga kababayan,” pahayag ng alkalde.
Ang pagkakaloob ng tulong ay alinsunod sa utos ni Pangulong Ferdinand Marcos Jr., bilang bahagi ng patuloy na suporta ng pamahalaan sa mga nasalanta ng kalamidad sa rehiyon.
