Umangat ang ranggo ng Romblon State University (RSU) mula ika-261 noong 2024 patungong ika-56 ngayong 2025 sa World University Rankings for Innovation (WURI).
Ipinahayag ang resulta sa 5th Hanseatic League of University Conference na ginanap sa Dumaguete City.
Ayon sa inilabas na datos ng WURI, mataas din ang naging resulta ng RSU sa ilang kategorya ng WURI:
Sa kategoryang Student Support and Engagement, pumangalawa ang RSU sa buong mundo at sa Pilipinas. Sa Crisis Management category, nakamit nito ang ikalimang puwesto sa buong mundo at unang puwesto sa bansa. Sa ESG (Environmental, Social & Governance) Trend category, nasa ikatlong puwesto ito sa mundo at una sa Pilipinas.
Sa isang pahayag ng pamantasan, sinabi nila na ang pag-angat ng ranggo ng RSU ay itinuturing na tagumpay para sa pamantasan at patunay ng patuloy nitong pagsusumikap sa pagpapabuti ng serbisyo at programa para sa mga mag-aaral ng Romblon.
