Namahagi ang Department of Agrarian Reform Provincial Office of Romblon (DARPO Romblon) ng pitong (7) E-Titles para sa pitong (7) Agrarian Reform Beneficiaries (ARBs) na sumasaklaw ng kabuuang 10.1577 ektarya ng lupa sa isang seremonya sa bayan ng San Andres.
Bahagi ito ng pagpapatupad ng Project SPLIT (Support to Parcelization of Lands for Individual Titling) na layong maipamahagi ang indibidwal na titulo ng lupa sa mga benepisyaryo ng reporma sa lupa.
Ang mga benepesyaryo ng E-Titles ay nagmula sa mga bayan ng Odiongan, San Andres, at Santa Fe.
Kasabay nito, isinagawa rin ang pormal na pagsasalin ng makinarya at kagamitang pansakahan sa limang (5) Agrarian Reform Beneficiaries Organizations (ARBOs) na may kabuuang halaga na Php 2.7 milyon at makikinabang ang tinatayang 454 ARBs.
Sinabi ni Camilo Claro Pacquing, OIC-Provincial Agrarian Reform Program Officer II ng DAR Romblon, na inaasahan nilang makatulong ang mga ipinamahaging titulo at makinarya sa mga benepisyaryo at hinikayat ang mga ito na pagyamanin ang natanggap na suporta.
Ayon naman kay Atty. Javie De Jesus-Fruelda, Chief ng Legal Services Division ng DAR Romblon, bukas ang kanilang opisina para tumulong sa mga ARBs na may mga legal na suliranin, at ipinaalala na libre ang kanilang serbisyo.
Layon ng aktibidad na mapalakas ang suporta sa mga magsasaka ng Romblon sa pamamagitan ng maayos na pamamahagi ng lupa at pagbibigay ng kinakailangang makinarya para sa mas produktibong pagsasaka.
