Aabot sa 14 na pamilya o 39 katao ang pansamantalang inilikas mula sa kanilang mga tahanan sa mga bayan ng San Agustin at San Andres dahil sa masamang panahong nararanasan sa lalawigan, ayon sa ulat ng Romblon Police Provincial Office.
Sa bayan ng San Andres, 9 na pamilya mula sa Sitio Core, Barangay Poblacion ang inilikas matapos pasukin ng malalakas na alon o daluyong ang kanilang mga tahanan. Inilikas sila patungo sa San Andres Central Elementary School na nagsisilbing evacuation center.
Samantala, sa Barangay Dona Juana, San Agustin, 5 pamilya ang inilikas matapos itaas ang banta ng landslide sa kanilang lugar bunsod ng tuloy-tuloy na ulan.
Ayon sa mga ulat, isinagawa ang force evacuation bilang bahagi ng preemptive measures ng mga lokal na pamahalaan upang matiyak ang kaligtasan ng mga residente.
Naka-deploy na rin ang mga opisyal ng barangay at Municipal Disaster Risk Reduction and Management Offices (MDRRMO) upang umalalay sa mga evacuees sa evacuation centers. Patuloy na mino-monitor ng mga awtoridad ang kalagayan ng panahon sa lalawigan.
Ang masamang panahon sa Romblon ay dala ng habagat na pinapalakas ng bagyong Emong sa loob ng Philippine Area of Responsibility. (with reports from Jordan Dorado/RNN)
