Sa pag-upo ng mga bagong grupo ng mga opisyales ng lalawigan ng Romblon, nagpahayag ang mga ito ng suporta sa mga programa ng bawat isa na naglalayong maibigay ang kinakailangang serbisyo sa mga Romblomanon.
Sa ginanap na oath-taking ceremony sa bayan ng Romblon, Romblon nitong June 30, binigyang-diin ni Congressman Eleandro Madrona ang panawagan ng pagkakaisa matapos ang halalan.
“Tapos na ang bangayan. Trabaho na tayo dapat. Napakarami ng ating hinaharap. Today we will be starting our three years of public service,” ani Madrona.
Binalaan niya ang mga kapwa opisyal at mamamayan na kung magpapatuloy ang alitan, walang mangyayaring pagtupad sa mga pangakong binitiwan noong eleksyon.
“Kung maglalaban-laban parin tayo, walang mangyayari doon sa mga commitments na ‘yun; at sino ang talo, hindi kami ang talo kundi ang mga minamahal,” dagdag pa niya.
Siniguro rin nito ang buong suporta ng mga alkalde sa mga bagong lider ng pamahalaang panlalawigan.
“I expect the full commitment to our beloved governor, to our beloved Vice Governor, and to our beloved Sangguniang Panlalawigan members,” pahayag ni Madrona.
Samantala, sinabi ni Vice Governor Arming Gutierrez na buong suporta siya sa mga programa ni Governor Trina Firmalo-Fabic, na kanyang pinuri bilang isang mahusay at may malinaw na bisyon na lider.
“Governor Trina is truly a visionary leader. Susuportahan ko at ng mga kasama ko sa Sangguniang Panlalawigan ang mga panukala ni Governor Trina upang isulong ang pag-unlad ng ating mahal na probinsya,” ani Gutierrez.
Nagpasalamat naman si Governor Trina Firmalo-Fabic sa ipinakitang suporta ng mga kapwa opisyal.
“Malaki po ang magagawa natin kung tayo ay nagkakaisa,” ani Firmalo-Fabic.
Ang bagong grupo ng mga leader ng probinsya ay tatlong taong uupo sa puwesto.
