Naranasan ng buong isla ng Simara sa bayan ng Corcuera, Romblon ang total power blackout mula alas-11 ng gabi, Mayo 11, hanggang pasado alas-6 ng umaga ngayong araw ng halalan, Mayo 12, 2025.
Ayon sa Romblon Electric Cooperative (ROMELCO), agad na nagsagawa ng line tracing ang kanilang mga linemen upang matukoy ang sanhi ng pagkawala ng kuryente. Sa isinagawang imbestigasyon, napag-alamang isang paniki ang sumabit sa linya ng kuryente, na naging sanhi ng power interruption.
Sa kabila ng blackout, tuloy pa rin ang pagbubukas ng mga polling precinct sa isla. Ayon sa mga residente, eksaktong alas-5 ng umaga ay nagsimula na ang botohan para sa mga senior citizen, PWD, at buntis.
Bandang alas-6:00 ng umaga ay naibalik na ang suplay ng kuryente sa buong isla. Ayon kay ROMELCO General Manager Rene Fajilagutan, normal na ang operasyon ng kuryente sa kasalukuyan.
Patuloy namang nakaantabay ang ROMELCO sa iba pang posibleng aberya upang masigurong tuloy-tuloy ang suplay ng kuryente sa panahon ng halalan.
