Napapakinabangan ng mga mangingisda ang bagong tayong one-tonner ice plant sa Marine Fish Landing Center sa San Agustin, na itinayo sa pagtutulungan ng Department of Science and Technology-MIMAROPA (DOST-MIMAROPA) at Lokal na Pamahalaan ng San Agustin.
Itinatag ang pasilidad upang tugunan ang matagal nang kakulangan sa yelo na pangunahing kailangan sa pagpreserba ng huli ng mga mangingisda. Ayon sa DOST-MIMAROPA, ang ice plant ay may kakayahang gumawa ng 25 hanggang 30 bloke ng yelo kada batch, na may bigat na 15 kilo bawat isa.
Ang yelo ay naibebenta sa halagang ₱60 kada bloke — mas mura at mas tumatagal kaysa sa karaniwang plastic-wrapped ice, at hindi na kailangang bumiyahe pa sa ibang barangay o bayan para makabili. Dahil dito, nabawasan ang gastos sa transportasyon ng mga mangingisda at tumataas ang kalidad at presyo ng kanilang huling isda sa merkado.
Bukod sa mga kagamitan gaya ng cooling tower, compressor, condenser, at ice crusher, naglaan ang LGU-San Agustin ng lupa, gusali, at electrical system para sa operasyon ng planta. Ang Barangay LGU-Carmen ang kasalukuyang nangangasiwa sa operasyon matapos ang isinagawang pagsasanay noong Pebrero 25–26, 2025.
Inaasahan na bukod sa pagtulong sa mga mangingisda ng San Agustin, makikinabang din dito ang mga karatig na bayan sa pamamagitan ng pagbuhos ng mas maraming huli sa Carmen Fish Landing Center — na maaaring magpalago ng lokal na kita at negosyo.
Ang proyekto ay bahagi ng layunin ng DOST-MIMAROPA at LGU-San Agustin na paunlarin ang sektor ng pangisdaan at palakasin ang kabuhayan sa pamamagitan ng siyensya, teknolohiya, at makakalikasang solusyon.
