Sa pagtatapos ng canvassing ng boto para sa Halalan 2025, naglabas ng pahayag si incumbent Governor Jose Riano upang magpasalamat sa mga mamamayan ng Romblon na sumuporta sa kanya sa loob ng kanyang panunungkulan bilang Bise Gobernador at Gobernador ng lalawigan.
Sa kanyang mensahe, ipinahayag ni Riano ang pasasalamat sa tiwala at pakikiisa ng publiko sa mga programang ipinatupad ng kanyang administrasyon. Binigyang-diin niya ang kahalagahan ng pagpapatuloy ng mga inisyatiba at proyektong inilunsad ng pamahalaang panlalawigan, na layuning makapaghatid ng serbisyo sa mga mamamayan ng Romblon.
Ayon kay Riano, ang pagtatapos ng kanyang termino ay panahon para magnilay at muling pag-isipan ang mga susunod na hakbang. Sa kabila ng resulta ng halalan, ipinaabot niya ang pagbati sa mga nahalal na bagong opisyal ng lalawigan at hinikayat ang publiko na magkaisa sa pagsusulong ng kaayusan at pag-unlad ng Romblon.
Nagpahayag din si Riano ng pagnanais na patuloy na maging bahagi ng mga hakbangin para sa ikabubuti ng lalawigan sa ibang kapasidad. Aniya, bilang pribadong mamamayan, mananatili siyang nakatutok sa mga isyung mahalaga sa Romblomanon.
Sa pagtatapos ng kanyang mensahe, muling nagpasalamat si Riano sa lahat ng naging bahagi ng kanyang panunungkulan at sa mga mamamayang patuloy na sumusuporta sa mga layunin para sa Romblon.
Si Riano ay tinalo sa katatapos lang na halalan ni Governor-elect Trina Firmalo-Fabic.
