Nanawagan ang Alyansa Tigil Mina (ATM) sa mga botante ng lalawigan ng Romblon na suportahan sina Trina Firmalo-Fabic bilang gobernador at Rodne Galicha bilang bise-gobernador sa darating na halalan sa Mayo 12.
Ayon sa grupo, may matibay na track record sina Firmalo-Fabic at Galicha sa pagsusulong ng mabuting pamamahala at pangangalaga sa kalikasan. Anila, kapwa nakaugat sa realidad ng mga komunidad ang dalawang kandidato—bilang mga lingkod-bayan, tagapagtanggol ng karapatang pantao, at aktibong tagapagsulong ng adbokasiyang pangkalikasan.
Kamakailan ay lumagda sina Firmalo-Fabic at Galicha sa Green Agenda 2025, isang platapormang isinusulong ng mga environmental group upang tugunan ang mga isyu gaya ng pagbabago ng klima, pagkawala ng biodiversity, at pagmimina.
Naniniwala ang ATM na ang kanilang paninindigan sa mga usaping pangkalikasan ay magdudulot ng makabuluhang pagbabago tungo sa likas-kayang kaunlaran sa buong lalawigan.
Dagdag ng grupo, kanilang babantayan at pananagutin ang mga kandidato sa kanilang mga pangakong plataporma kung sakaling mahalal sa puwesto.
