Pinangunahan ng Department of Science and Technology (DOST) – MIMAROPA ang isang immersion activity sa Barangay Danao, Cajidiocan, Romblon, na layuning suportahan ang lokal na inobasyon at pag-unlad ng kabuhayan ng mga mamamayan.
Bumisita ang Romblon DOST Evaluation Team upang obserbahan ang iba’t ibang lokal na produkto tulad ng tiger grass broom, mga pagkaing gaya ng balatsaw at pinais, egg noodles, at mga semi-precious stones na gawa ng mga artisan sa isla.
Ayon kay Dr. Randy Nobleza ng Marinduque, bahagi ng evaluation team, may kaugnayan ang ilang produkto sa pagdiriwang ng Filipino Food Heritage Month.
Nakipagpulong rin ang mga guro mula sa Romblon State University – San Fernando kay Jacinto Asuncion, Jr., isa sa mga product evaluator, na nagbahagi ng impormasyon hinggil sa pananaliksik at pag-develop ng produkto.
Sa bahagi ng forum, nagbigay ang ilang tagapagsalita ng rekomendasyon ukol sa mga produktong gumagamit ng rattan, vines (bagging), at iba pang forest materials na may kaukulang regulasyon mula sa Department of Environment and Natural Resources (DENR).
Maliban dito ay isang forum din ang isinagawa tungkol sa semi-precious stones na pinangunahan ni Dr. Gabriel Theopilo Valera ng University of the Philippines – National Institute of Geological Sciences, bilang bahagi ng suporta sa maliliit na gumagawa ng alahas sa rehiyon.
Ang aktibidad ay bahagi ng programang GRIND na ipinatutupad ng DOST upang palawakin ang partisipasyon ng mga komunidad sa larangan ng agham, teknolohiya, at inobasyon. (with reports from Randy Nobleza)
