Halos dalawang linggo bago ang National and Local elections sa susunod na buwan, halos handa na ang Commission on Elections (COMELEC) sa lalawigan ng Romblon para dito.
Sa isinagawang Kapihan sa PIA Romblon nitong April 29, sinabi ni Provincial Election Supervisor Atty. Ryan Santos na nagsimula ang kanilang paghahanda para sa halalan noon pang 2023, bilang bahagi ng tuluy-tuloy na trabaho ng ahensya.
Aabot na sa 90 hanggang 95 porsyento ang antas ng kahandaan ng COMELEC Romblon. Ang natitirang porsyento ay nauukol sa pagdating at beripikasyon ng mga opisyal na balota at iba pang mahahalagang dokumento.
Pagdating ng mga balota sa lalawigan, agad itong sinusuri upang matiyak ang tamang alokasyon at maayos na distribusyon sa mga itinalagang presinto.
Patuloy rin ang pakikipag-ugnayan ng COMELEC sa Romblon Police Provincial Office, Philippine Coast Guard, at Bureau of Fire Protection (BFP) upang matiyak ang seguridad at kaayusan sa panahon ng halalan.
Nagsimula na rin ang paghahatid ng mga automated counting machines (ACMs) sa mga bayan sa lalawigan. Nitong Martes, naipadala na ang mga makina patungong mga isla ng Concepcion at Banton na nangangailangan ng paglalayag dahil sa lokasyon nito.
Tiniyak ng COMELEC Romblon na ginagawa ang lahat ng kinakailangang hakbang upang masiguro ang isang maayos, ligtas, at kapani-paniwalang halalan sa lalawigan.
