Nasawi ang driver ng tricycle sa Barangay Ambulong, Magdiwang, Romblon matapos maaksidente sa kahabaan ng national road noong hapon ng Setyembre 29.
Ayon sa ulat ng Magdiwang Police Station, ang biktima, na kinilalang si Daniel Serious Delos Santos, 63, ay patungo sa Cajidiocan upang dalhin ang may-ari ng tricycle sa ospital para sa isang medical checkup.
Nang makarating sila sa Barangay Ambulong, nawalan umano ng kontrol si Delos Santos sa minamanehong tricycle, dahilan upang lumihis ito sa kalsada at bumangga sa isang puno. Dahil sa lakas ng impact, nagtamo ng malubhang sugat sa ulo ang driver at agad isinugod sa Rural Health Unit ng Magdiwang. Gayunpaman, idineklara siyang dead on arrival ng mga doktor.
Ayon sa mga kamag-anak ng biktima, baguhan pa lamang si Delos Santos sa pagmamaneho ng tricycle. Dagdag pa rito, napag-alaman sa imbestigasyon ng pulisya na may problema ang tricycle, kabilang ang pagiging misaligned at pagkakaroon ng kabig, na maaaring naging sanhi ng aksidente.
