Ipinatupad ng Bureau of Jail Management and Penology (BJMP) sa buong rehiyon ng MIMAROPA ang “blue” alert status sa 19 na pasilidad nito simula Nobyembre 1 hanggang Nobyembre 2, sa paggunita ng All Saints’ at All Souls’ Day.
Batay sa direktiba ng BJMP Regional Office MIMAROPA, limampung porsyento ng tauhan ang itatalaga para sa seguridad at kaayusan sa mga araw ng Undas 2024.
Bilang bahagi ng paghahanda, pinangunahan ni Assistant Regional Director for Operations Jail Superintendent Ray de Luna ang pag-inspeksyon sa limang BJMP-manned facilities sa Palawan upang masiguro ang kahandaan ng mga tauhan.
Ayon kay JSupt. de Luna, inaatasan ang mga tauhan na direktang mag-ulat sa sitwasyon ng mga piitan upang mapanatili ang kaligtasan at kaayusan ng mga PDL (persons deprived of liberty).
Bukod sa seguridad, ipagkakaloob din ng BJMP ang isang lugar sa bawat pasilidad kung saan maaaring magtirik ng kandila ang mga PDL bilang paggunita sa kanilang mga yumaong mahal sa buhay.
Dagdag ni JO3 Joefrie Anglo, Information Officer ng BJMP MIMAROPA, ang pamamahagi ng kandila ay pamamahalaan ng BJMP upang matiyak ang kaligtasan at kaayusan sa loob ng mga piitan. Kasama rin sa paghahanda ang mahigpit na pagbabawal sa mga kontrabando tulad ng alak at sigarilyo para mapanatili ang katahimikan sa loob ng mga pasilidad. (PR)
