Nasawi ang isang lalaking lasing matapos itong pagsuntukin at itulak sa dagat sa pantalan ng Cajidiocan, Romblon.
Ayon sa ulat ng Cajidiocan Municipal Police Station, ang namatay na lalaki ay si Joan Rollo Bea, 40, habang ang suspek ay si Ruben Raet Concepcion Jr., 32.
Bandang alas-5:30 ng hapon kahapon, bigla umanong sinakal ni Bea ang suspek, na nagdulot ng galit nito. Bilang ganti, sinuntok si Bea ng suspek bago ito itulak sa dagat. Pagkatapos nito, agad na umalis ang suspek sa lugar.
Nang makita ng mga saksi na hindi umaahon si Bea sa dagat, agad itong sinakluluhan at inattempt na i-revive, ngunit sila'y nabigo. Inideklara na dead on arrival si Bea sa ospital.
Sumuko naman ang suspek na si Concepcion Jr. sa mga tauhan ng Cajidiocan Municipal Police Station. Ayon sa kanyang kwento, may matagal na silang alitan ni Bea.
Isasalang sa post-mortem examination ang labi ng biktima para mas matukoy ang cause of death nito.
Sa kasalukuyan, iniha-handa na ang kasong murder laban sa suspek.
