Pormal nang inilabas ngayong Lunes ng Department of Environment and Natural Resources (DENR) ang cease and desist order para sa konstruksyon ng pantalan ng Altai Philippines Mining Corporation (APMC) kasunod nang mga nakitang paglabag ng ahensya sa mining company.
Ang kautusan ay laman ng joint order na pirmado nina Engr. Glenn Marcelo Noble ng Mines and Geosciences Bureau – Mimaropa, Joe Amil Salino ng Environmental Management Bureau – Mimaropa, at Lormelyn Claudio, Regional Executive Director ng DENR Mimaropa.
Bahagi rin ng kautusan ang pansamantalang pagsuspende sa Transport Permit ng APMC at pagtitigil sa pagbiyahe ng mga mineral ore mula sa mining site patungo sa pantalan.
Denied rin ang application ng APMC para sa Miscellaneous Lease Agreement.
Inaasahang maghahain ng kaukulang legal na reklamo ang Provincial Environment and Natural Resources Office (PENRO) ng DENR sa Romblon kontra sa APMC dahil sa pagpuputol ng punong kahoy nang walang permit.
Inatasan an rin ang PENRO na magsagawa ng imbestigasyon sa posibleng mga nasirang mga halamang dagat at marine resources sa Sitio Bato.
Ang nasabing cease and desist order ay ibinahagi sa Facebook Account ni Governor Jose Riano na nagsabi na patuloy siyang nakikinig sa mga hinaing o karaingan upang ito ay mabigyan ng solusyon at maiwasan na maulit ang mangyari noong nakaraang araw.
“Bilang ama ng ating lalawigan kayo ang aking mata at ako naman ang inyong boses upang maiparating natin sa mga kinauukulan ang mga illegal na gawain at mapahinto ito ng naaayon sa batas,” pahayag ng gobernador.
