Kaugnay ng pag-obserba ng National Heritage Month o Pambansang Buwan ng Pamana na ipinagdiriwang tuwing Mayo ay ating bisitahin ang ilang museo sa bansa na maituturing na mga pambansang pamana, tulad na lamang ng Museo ng Pampangulong Sasakyan na matatagpuan sa Quezon Memorial Circle sa Lungsod ng Quezon.
Matutunghayan sa museong ito ang 16 na sasakyan kung saan 12 sa mga ito ay presidential cars at ang apat naman ay mga sasakyang sa mahahalagang pangkasaysayang okasyon.
Ayon kay Ismael Magallanes, Jr., Officer In-Charge ng Museo ng Pampangulong Sasakyan ang pinakalumang sasakyan na tampok sa museo, ang sasakyang ginamit ni Pangulong Emilio Aguinaldo na Packard Single Tix Touring Model 233 na gawa pa noong 1924.
Nariyan din ang 1937 Chrysler Airflow Custome Imperial CW na ginamit ni Pangulong Manuel L. Quezon.
Ang 1941 Packard 180 nina Pangulong Jose P. Laurel at Pangulong Sergio Osmena.
Ang 1940 Cadillac Fleetwood Series 75 na ginamit ni Pangulong Manuel Roxas.
Ang 1953 Chrysker Crown Imperial na ginamit ni Pangulong Elpidio Quirino.
Ang 1955 Cadillac Series 75-23 Fleetwood a ginamit ni Pangulong Ramon Magsaysay.
Ang 1959 Cadillac de Ville na kahalintulad ng ginamit ni Pangulong Diosdado Macapagal.
Ang 1980 Lincoln Continental Mark Vi na ginamit ni Pangulong Ferdinand Marcos.
Ang Mercedes Benz 500 SEL na ginamit ni Pangulong Corazon Aquino.
Ang Mercedes Benz 500 SEL Guard na ginamit ni Pangulong Fidel Ramos.
Ang Mercedes Benz S600 na ginamit ni Pangulong Joseph Estrada.
Ang pinakahuli ay ang Mercedes Benz S600 (LWB) na ginamit ni Pangulong Gloria Macapagal Arroyo.
Samantala, ang iba pang sasakyang may mahalagang kasaysayan ay ang 1935 Cadillac V-16 na ginamit ni Pangulong Manuel Quezon ngunit kalaunan ay ibinigay ito kay General Douglas MacArthur noong 1937.
Naroon din ang 1943 Willy’s Jeep na ibinigay ni General Douglas MacArthur at ginamit ni Ramón Magsaysay sa kanyang panunungkulan bilang Secretary of National Defense.
Ang 1960 Rolls Royce Phantom V na pag-aari ni Imelda Marcos at ang kalesa na pag-aari ng pamilya ni León Apacible na ginamit nito habang siya ay miyembro ng komisyon na gumawa ng Malolos Constitution.
Sinabi rin ni Magallanes, na hindi lamang mga simpleng sasakyan ang nasa museo, bagkus ang mga ito ay maituturing na pamana ng ating bansa sapagkat ang mga sasakyang ito ay may mga kahalagahan sa ating kasaysayan. Ikinikwento nito ang mayamang kasaysayan ng ating bansa at ang kwento ng mga pangulong gumamit nito.
Ang Museo ay pinasinayaan noong Agosto 19, 2018, kasabay ng pagdiriwang ng 140th Birth Anniversary ng Founding Father ng Quezon City na si President Manuel Quezon.
Inaanyayahan din ni Magallanes ang lahat na bisitahin ang Museo ng Pampangulong Sasakyan at ang 27 pang mga museo sa bansa na pinamamahalaan ng National Historical Commission of the Philippines (NHCP) kung saan ay libre itong mapuntahan ng publiko mula Martes hanggang Linggo.
Ang pagdiriwang ng Pambansang Buwan ng Pamana ay sa bisa ng Presidential Proclamation No. 439. Layunin ng pagdiriwang na magkaroon ang mga Pilipino ng kamalayan, paggalang, at pagmamahal sa mga pamanang kultural ng ating kasaysayan.
