Sugatan ang isang forest ranger sa bayan ng San Fernando, Romblon matapos itong tagain ng sinita nitong lalaking magpuputol sana ng punong kahoy.
Sa ulat ng San Fernando Municipal Police Station, bandang alas-9:30 ng umaga nang mangyari ang krimen sa Sitio Cross Country, Barangay España.
Habang nagpapatrol umano ang biktimang si Forest Ranger Emeterio Mordido Quarre, 45, nakita nito ang suspek na may dalang chainsaw at magpuputol sana ng puno.
Pinigilan ng forest ranger ang suspek na magputol ngunit bumunot umano ang suspek ng bolo at tinaga ang biktima.
Matapos ang krimen ay tumakas ang suspek dala ang kanyang chainsaw at kalaunan naman ay sumuko sa pulisya.
Ang biktima naman ay isinugod sa San Fernando Rural Health Unit at kalaunan ay inilipat sa Sibuyan District Hospital para gamutin.
Sasampahan ng kasong frustrated homicide ang suspek.
