Tila naging ‘tong-its' ang eksena nitong mga huling araw ng pag-file ng COC bilang pamalit sa mga naunang naghain ng kanilang kandidatura para sa pagkapangulo, pangalawang-pangulo at senador. Bagamat maraming mga haka-haka sa magiging balasa ng mga kandidatura, pero sadyang mailap yata na matumbok ang talagang punterya ng mga kandidato lalo sa hanay ng mga administration candidates at mga kaalyado nito.
Bakit kamo? Inaasahan na tatakbo sa pagkapangulo si Mayor Sara Duterte, dahil na rin sa naunang pahiwatig ng kaalyado nito na si House Deputy Speaker Joey Salceda. Mas lalo pang lumakas ang hinala na presidente nga ang tumbok ni Mayor Sara dahil sa pahiwatig ni Sen. Bato Dela Rosa – aspirant sa pagkapangulo sa ilalim ng PDP-Laban na magwi-withdraw ito ng kanyang kandidatura. Ang nakikita, si Mayor Sara ang papalit kay Sen. Bato Dela Rosa, samantalang si PRRD naman ay inaasahang tatakbo sa pagkapangalawang-pangulo.
Pero hindi rin ito nangyari, dahil ang naging ending, tumakbo si Mayor Sara bilang pangalawang-pangulo sa ilalim ng Lakas CMD at nagsanib-pwersa naman kay dating senador Ferdinand Marcos Jr. na aspirant sa pagkapangulo.
Hindi na ito bago, dahil noong 2016 national elections ay ganito rin ang ginawa ni PRRD, dahil taliwas sa mga public pronouncement nito na hindi tatakbo, pero tumakbo rin bilang substitute ng noo'y presidential aspirant na si Martin Diño.
Ang tanong, ito nga ba ay sadyang stratehiya lang sa pulitika o ng kanilang pagtakbo? Kung stratehiya nga ito, ito ba ay tanggap ng mga nakararami? Kung stratehiya nga lamang ito, kailangan ba talagang gamitan ito ng pagpapanggap at pagsisinungaling upang dalhin ang isip at emosyon ng mga tao sa isang dimensyon o desinyo ng pagpapaniwala ng mga ito?
Well, kung susuriin ang legalidad ng mga aksyong ito ay wala namang paglabag, dahil sa ngayon sa probisyon ng Omnibus Election Code ng Pilipinas ay pinapahintulutan nga naman ito.
Siguradong hati ang pagtanggap dito ng mga tao. Maaaring sa iba ay OK lang ito, at sumasang-ayon na stratehiya nga lamang ito, samantalang sa iba naman, dahil nga ang nasabing aksyon ay kinalalakipan ng pagpapanggap at pagsisinungaling kung kaya't ito'y maituturing na isang panloloko at paglapastangan sa disinsanay sagradong pagganap ng eleksiyon.
Sa huli, tayong mga tao pa rin ang magtatakda ng ating mga sagradong boto, kung kaya't piliin natin ang mga kandidato base sa tamang kwalipikasyon ng mga ito sa position na kanilang tinatakbuhan, track record ng kanilang panunungkulan sa pamahalaan, direksyon ng pamumuno o plataporma de gobyero, at mga prinsipyo at ipinaglalaban nito sa mga usaping nasyonal at internasyonal.
Gabayan sana tayo ng ating Dakilang Maykapal sa ating pagpili ng mga susunod na mamumuno sa ating bansa.
