Umabot na sa kabuuang P274,984,328.32 ang Special Risk Allowance (SRA) na naipamahagi ng Department of Health (DOH) Mimaropa sa 21,015 Health Workers (HW) sa rehiyon, mula Setyembre 15, 2020 hanggang Hunyo 30, 2021.
Sa virtual presscon na ipinatawag ng DOH Mimaropa ngayong araw, ay ipinaliwanag ni Joselito Padua, Chief Administrative Officer ng DOH-4B, na ang SRA ay karagdagang benepisyong ibinibigay sa mga pribado at pampublikong health care worker na katuwang ng pamahalaan sa pagbibigay ng critical at urgent health care sa mga pasyenteng may Coronavirus Disease 2019 (COVID-19).
“Makakatanggap ng SRA ang mga frontliner natin na nasa quarantine facility, medical facility o laboratory,” ani Padua. Sakali aniyang makumpleto ng isang HW ang 22 araw sa isang buwan na pasok sa trabaho, katumbas nito ay P5,000 SRA bawat buwan.
Sa ulat na ibinahagi ng opisyal, unang ipinagkaloob ang higit 94 na milyong pisong SRA sa 7,612 HWs sa rehiyon, simula Setyembre 15 hanggang Disyembre 19, 2020. Kasunod nito ay naipamahagi ang P180, 281,047 sa 13,403 HWs sa pagitan ng Disyembre 20, 2020 at Hunyo 31, 2021.
Nagbigay din ang DOH Mimaropa, sa loob ng parehong panahon, ng aabot sa P21, 425,767 sa may 1,496 deployed health personnel na nakatalaga sa iba’t ibang lalawigan sa rehiyon. “Ang mga deployed health personnel natin ay kabilang sa tinatawag nating Human Resources for Health; sila ang mga contractual nurses at midwives na nagtatrabaho sa kani-kanilang probinsya,” dagdag ni Padua.
Nabatid din kay Padua na matapos ipamahagi ang SRA, may mga ulat na nakarating sa DOH Central Office na marami pang eligible HWs na hindi nakatanggap dahil hindi agad naisumite ang kanilang mga pangalan. Kaya’t sa bisa ng isang memorandum na inisyu ni Health Usec. Leopoldo Vega noong Agosto 21, naglaan ng pondo ang pamahalaan at tumanggap ng higit P1 milyon ang unang batch na binubuo ng 268 health workers mula sa apat na medical facility sa Oriental Mindoro, tatlo mula sa Palawan at tig-isang facility sa Marinduque at Occidental Mindoro.
Samantala, tinatayang higit P32 milyon ang inaasahan pang dagdag na SRA funds na nakalaan para sa kasunod na batch ng may 2989 HWs mula sa limang lalawigan ng rehiyon. (Voltaire N. Dequina/PIA MIMAROPA)
