Umabot na sa 149,200 bakuna ang naipamahagi ng Department of Health (DOH)-Mimaropa sa buong rehiyon, ayon sa ulat ni DOH Regional Director Dr. Mario S. Baquilod sa “Ika-5 Regional Pre-SONA Series: Pamana ng Pagbabago, Kasama sa Pamana” na ginanap sa Calapan City kamakailan.
Sinabi ni Baquilod, “91,000 bakuna ng Sinovac at 58,200 na AstraZeneca ang naipamahagi na ng DOH sa limang lalawigan at dalawang lungsod sa rehiyong Mimaropa simula Marso 5 hanggang Mayo 18 at patuloy pa rin ang aming paghahatid ng mga bakuna mula sa pamahalaang nasyunal.”
Inihahatid aniya ang mga nasabing bakuna sa mga kabisera at ilang maliliit na isla sa lalawigan sa pamamagitan ng mga helicopter, eroplano, RoRo at mga bangka.
Samantala, upang maiwasan ang pagkalat ng nakamamatay na sakit ay patuloy lamang sa pagmamatyag ang mga lokal na pamahalaan lalo na sa minimum public health standards, paghahatid ng mga anunsiyo o babala sa lansangan at pagkakawang-gawa sa pamamagitan ng pamamahagi ng mga food pack, hygiene kits at tulong medikal.
Kailangan din agad na maidala sa mga molecular laboratory ang specimen upang malaman kung ang isang tao ay nahawaan ng COVID-19 kasabay ng patuloy na pagpapadala ng mga cartridges para sa Gene Xpert laboratory at palakasin ang mga contact tracing sa pamamagitan ng grupo na siyang magsasagawa ng paghahanap sa mga nahawan ng virus.
Ayon pa sa director ng kalusugan, “ipagpatuloy pa natin ang pakikipag-ugnayan sa mga ahensiya ng pamahalaan para sa pagpapatayo ng ilang mga isolation facility gayundin ang karagdagang tauhan na siyang makikipag-ugnayan sa mga mga tao sa paghahanap ng posibleng may sintomas ng COVID-19 at karagdagang ospital para sa COVID-19 sa pamamagitan ng paglunsad ng isang Hospital Command Center upang alamin kung saang pagamutan maaring dalhin ang pasyenteng may virus.”
Nanawagan din si Baquilod sa mga LGU na ipagpatuloy ang pagkakaloob ng mental health at psycho-social services sa mga pasyente at frontliners, pagpapanumbalik ng mga programang serbisyo para sa kalusugan at ang pagmo-monitor sa mga lugar ng pinagtatrabahuan at komunidad. (Dennis Nebrejo/PIA Mimaropa)
