Kinumpirma ng Calapan City Health and Sanitaton Officer na si Dr. Liza Llanto na nagpositibo ang pitong tauhan ng National Bureau of Investigation (NBI)-Mimaropa Regional Office sa COVID-19.
Nahawa ang mga kawani sa isang opisyal at mga kapwa staff na nanggaling sa Metro Manila na naunang nagpositibo sa COVID-19.
Ang mga tauhang ito ay kasalukuyang naka-isolate sa opisina ng NBI sa lungsod ng Calapan. Samantala, ang opisyal at iba pang tauhan na nauna nang nagpositibo sa COVID-19 ay naka-quarantine sa Metro Manila.
Binibigyang-diin ng ahensya na isolated case lamang ang mga kasong ito sa loob ng NBI compound at pinapayuhan ang mga taong nagkaroon ng transaksyon sa NBI o nagkaroon ng anumang contact sa mga tauhan ng ahensya simula noong Hulyo 10 na obserbahan ang kanilang kalagayan at agarang makipag-ugnayan sa City Health Sanitation Department o sa kanilang mga barangay officials kung makakaramdam ng sintomas o anumang kakaiba sa kanilang kalusugan.
Ayon kay Calapan City Mayor Panaligan, “nagbigay na ako ng kautusan sa Calapan City Police na ilagay ang NBI Office sa Calapan sa total lockdown sa loob ng 14 na araw”.
Aniya, wala munang transaksyon sa nasabing tanggapan at walang papayagang makapunta sa loob ng NBI habang isinasagawa ang 14 araw total lockdown.
“Para po malinaw, ang lockdown ay limitado lamang sa NBI compound sa Sta. Isabel. Hindi po sa buong barangay o lungsod. Ang buong lungsod ay nananatiling bukas sa ilalim ng Modified General Community Quarantine (MGCQ)”, dagdag ni Mayor Panaligan.
Habang patuloy na pinag-iingat ang lahat, patuloy pa rin ang paalala ni Mayor Arnan Panaligan na palagiang magsuot ng face mask, sumunod sa physical distancing at pangalagaan ang kalusugan. (Lisabelle Carpio/PIAMimaropa/Calapan)
